Zyra e Këshillimit të Karrierës në Kolegjin Universitar “Qiriazi” vepron si një pikë kyçe mbështetëse për studentët, duke i ndihmuar ata të ndërtojnë rrugën e tyre drejt zhvillimit profesional dhe integrimit me sukses në tregun e punës.

Ky shërbim synon të ndihmojë individët për të eksploruar mundësitë e karrierës, për të kuptuar potencialin e tyre dhe për të marrë vendime të informuara e të qëndrueshme për të ardhmen profesionale.

Vizioni

Të fuqizojë studentët për të marrë zgjedhje të përgjegjshme dhe të qëndrueshme gjatë gjithë jetës së tyre, në një botë globale, dinamike dhe në ndryshim të vazhdueshëm.

Misioni

Të shërbejë nevojave të studentëve për zhvillim të karrierës, duke ofruar shërbime me cilësi të lartë përmes:

• këshillimeve të personalizuara,

• konsulencave profesionale,

• partneriteteve të qëndrueshme me institucione dhe kompani vendase apo ndërkombëtare.

Qëllimi përfundimtar është promovimi i profesionalizmit, forcimi i identitetit individual dhe qytetarisë aktive tek studentët.

Shërbimet dhe Aktivitetet Kryesore

• Paketë informuese për maturantët dhe studentët e rinj, e përgatitur çdo fillim viti akademik në formatin e fletëpalosjeve, guidave informuese, afisheve dhe materialeve digjitale.

• Prezantimi dhe promovimi i programeve të studimit në shkollat e mesme, në bashkëpunim me dekanët dhe shefat e departamenteve.

• Mbështetja e Këshillit Studentor, si një strukturë përfaqësuese e studentëve në jetën institucionale.

• Krijimi dhe përditësimi i bazës së të dhënave me kontaktet e shkollave të mesme dhe të dhëna të tjera të rëndësishme për orientimin profesional.

• Organizimi i Panairit të Karrierës, duke ftuar institucione, sipërmarrje dhe organizata për të krijuar mundësi praktike dhe punësimi për studentët.

• Ofrimi i informacionit të përditësuar, fizikisht dhe në mënyrë elektronike, për konferenca studentore, shkolla verore, bursa studimi brenda dhe jashtë vendit, trajnime dhe praktika profesionale.

• Hartimi dhe përditësimi i Skedës së Punësimit për studentët e të gjitha cikleve të studimit: Profesional, Bachelor, Master Profesional dhe Master Shkencor.

• Lëshimi i dokumentacionit zyrtar për praktikën profesionale të studentëve pranë institucioneve, organizatave dhe biznesit privat.

• Këshillim dhe shërbim pritjeje për të orientuar aplikantët dhe studentët aktivë për çdo çështje akademike apo administrative që lidhet me rrugëtimin e tyre universitar dhe profesional.