Me moton “Open doors, open future, open day – dyer të hapura, e ardhme e hapur, ditë e hapur”, në “mjediset e hapura” të Kolegjit Universitar “Qiriazi”, u zhvillua “Panairi i Punës,” në bashkëpunim me Dhomën e Tregëtisë dhe Industrisë Tiranë si dhe me Agjencinë Rinore të Bashkisë së Tiranës.
Rreth 40 kompani prodhuese e tregtuese, vendosën stendat e tyre në Panair dhe studentët tanë patën mundësinë që të kontaktojnë me përfaqësuesit e secilës prej këtyre kompanive dhe të shkëmbejnë mendime e përvojë. Kolegji universitar Qiriazi, gjatë të gjithë periudhës së funksionimit ka vlerësuar, si auditoret apo laboratoret në ambjentet e godinës ashtu edhe kompanitë private të prodhimit apo tregtimit, me të cilat ka marrëveshje. Në qendër të kësaj marrëveshjeje është studenti, formimi i tij me dije teorike e praktike, por edhe punësimi si gjatë periudhës së studimeve (në sezonin veror) e çka është më e rëndësishmja, punësimi i përhershëm pas përfundimit të studimeve. Kompani të tilla si: “Lufra”, “Mondial”, “Tradita ime artizanale”, “Miell Tirana”, “OTP Bank”, “Rogner”, “MK Hotel Tirana”, “Sky Tower”, “Prestigje”, “Vila Shehi”, “Vila 60”, “Zyra kontabel [email protected]”, “IMP-Agjensi Punësimi”, “ATHS” etj, janë kthyer tashmë, jo vetem në “laboratoret” praktike të studentave tanë, por edhe në qendra punësimi pasi ata diplomohen. Lista e gjatë e këtyre partnerëve sa vjen e shtohet.
Kryetari i Dhomës së Tregtisë dhe Industrisë së Tiranës, Nikolin Jaka, i orientoi studentwt, që pasi të diplomohen, të mësyjnë nga sipërmarrjet. Të marrin përsipër detyra për veten e tyre. Me këtë nuk dua të them që të përbuzet puna e shtetit apo administrata civile, sepse edhe ato janë punë të vlefshme, por janë të kufizuara si oferta.
Bashkëorganizatori tjetër i këtij Panairi është edhe Agjencia e Rinisë në Bashkinë e Tiranës, e cila përfaqësohej në këtë aktivitet nga drejtoresha e agjencisë Enkelejda Hamzaj. Sipas drejtoreshës, arritja më e madhe sot është “karta e studentit”.
Janë rreth 80 mijë studentë që kanë aplikuar. Ka mbi 2 mijë biznese, që me moton “fokusi ynë je ti”, janë bërë pjesë e kësaj karte, të cilat ofrojnë shërbime me tarifa më të ulta për studentët. Spikasin në këto biznese shërbimet e ndryshme shëndetësore, dentale, fizioterapi, laboratoret e analizave mjeksore, optika, qendra kursesh etj, që ulin tarifat e shërbimeve të tyre nga 25-60 përqind, për të gjithë ata që kanë në pronësi kartën e studentit.
Karta e studentit, sidomos për studentët e “Qiriazit”, siç edhe për ata të Universitetit Bujqësor të Tiranës, do të marrë më shumë vlerë kur të vihet në funksion kompleksi i “Shtëpisë së Studentit” në Kodër Kamëz, i cili është ndërtuar i ri, që nga themelet dhe me të gjitha kushtet.
Në emër të partnerëve të Kolegjit Universitar “Qiriazi”, foli drejtoresha e burimeve njerëzore në OTP Bank, Irida Vejsiu. Ajo theksoi nevojën e të mësuarit gjatë të gjithë jetës, sepse me marrjen e diplomës nuk përfundon edhe marrja e dijeve. Vemë re në intervistat tona, shtoi ajo, se pretendentët për t’u punësuar, synojnë më së pari rolin e menaxherit, pa e peshuar veten me dijet dhe me përvojën që kanë. Duhet të fillosh me ndonjë shkallë më poshte se sa menaxher.
