Me moton “Open Doors, Open Future, Open Day – dyer të hapura, e ardhme e hapur, ditë e hapur”, në mjediset  Kolegjit Universitar “Qiriazi”, u organizua “Open Day”.

Një numër i konsiderueshëm i maturantëve të ardhur nga bashkia e Tiranës, bashkia e Kamzës, por edhe bashkitë e tjera, muarën pjesë në aktivitetet e “Open Day”. Disa prej tyre përfituan edhe nga Panairi i Punës, që u zhvillua në të njëjtën ditë, por interesi i tyre ishte të njiheshin me ambjentet e Universitetit. U takuan me pjesëtarë të stafit pedagogjiko-shkencor dhe bënë bashkëbisedim. U njohën me Klinikën Ligjore, pjesë e fakultetit të Drejtësisë. Bënë vizita në laboratorët e Hoteleri-Turizëm, Teknologjisë Ushqimore dhe Teknologjisë së Informacionit. Shumë maturantë ishin të interesuar kryesisht për ambjentet sportive  dhe aksesorë të tjerë të fakultetit të Edukimit dhe Sporteve, i cili ka vitin e parë të funksionimit. Fakulteti i Sporteve veçanërisht, qysh në vitin e parë të hapjes, ka tërhequr një numër të konsiderueshëm studentësh dhe në vitin e ri akademik, kërkesat janë shumëfishuar.

Rektori i këtij universiteti, Prof. Dr. Maksim Meço, duke u takuar me grupe të studentëve, por kryesisht të maturantëve, që kishin ardhur për t’u njohur me universitetin, u tha mes tjerash:  Jam i privilegjuar që e drejtoj  këtë universitet, sa të vjetër aq edhe të ri, me të shkuar të lavdishme dhe me të ardhme të sigurt. Ju uroj të bëheni pjesë e jona, së shpejti.

Në fund të kësaj dite të ngarkuar, ja vlente një “Qiriazi-fest”: argëtim, muzikë, pije joalkoolike pa limit. Shërbim bufeje për të gjithë të pranishmit: studentët, maturantët, prindërit, të ftuarit. Për të gjithë.