Biografia
Prof. Asoc. Dr. Pashk Lekaj është pedagog, studiues dhe autor me një përvojë të gjatë akademike dhe profesionale në fushat e matematikës, informatikës dhe aplikimeve të tyre në shkencat bujqësore e pyjore. Aktualisht është pedagog dhe drejtues i Departamentit të Teknologjisë së Informacionit pranë Kolegjit Universitar “Qiriazi”, ku ushtron veprimtarinë e tij prej vitit 2017.
Prof. Asoc. Dr. Pashk Lekaj ka përfunduar studimet për Matematikë, pranë Fakultetit të Shkencave të Natyrës, Universiteti i Tiranës, në vitet 1967–1972, si dhe një kurs njëvjeçar të specializuar në Matematikë pranë të njëjtit fakultet. Më tej, ka përfunduar studimet Master në Fakultetin e Shkencave Pyjore pranë Universitetit Bujqësor të Tiranës, si dhe ka ndjekur kurse të ndryshme në fushën e informatikës brenda dhe jashtë vendit.
Karriera e tij profesionale përfshin një përvojë të gjerë në arsimin parauniversitar dhe universitar.
- 1973–1988 ka punuar në sektorin e arsimit në Pukë, përfshirë edhe detyra drejtuese.
- 1989-2014, pedagog në Universitetin Bujqësor të Tiranës
- 2015–2017, pedagog në Universitetin Mesdhetar të Shqipërisë.
Prof. Asoc. Dr. Lekaj ka një veprimtari të pasur kërkimore dhe botuese. Ai është autor dhe bashkautor i rreth 30 artikujve dhe kumtesave shkencore, të paraqitura në revista dhe konferenca kombëtare e ndërkombëtare, me tematika që përfshijnë matematikën e aplikuar, informatikën, shkencat bujqësore dhe pyjore, ekonominë, mjedisin dhe zhvillimin rural; autor dhe bashkautor i disa botimeve akademike dhe teksteve mësimore.
Ka kontribuar në hartimin e teksteve të Matematikës dhe Informatikës për arsimin parauniversitar, të miratuara nga Ministria e Arsimit dhe Shkencës.
Me një karrierë mbi pesëdekadëshe në arsim, mësimdhënie dhe kërkim shkencor, Prof. Asoc. Dr. Pashk Lekaj ka dhënë një kontribut të qëndrueshëm në formimin e brezave të nxënësve dhe studentëve, si dhe në zhvillimin e mësimdhënies dhe kërkimit në fushat e matematikës dhe teknologjisë së informacionit.
- Për kontributin e tij në arsim është vlerësuar me titullin “Mësues i Merituar” nga Kuvendi Popullor.
