Biografia
Dr. (në proces) Eva Ceka është specialiste e shkencave ushqimore dhe profesioniste akademike, e specializuar në Teknologji Ushqimore, Inxhinieri Agroushqimore, cilësi dhe siguri ushqimore, si dhe analiza ushqyese. Ajo ka përfunduar studimet Bachelor në Teknologji Ushqimore dhe Master i Shkencave në Inxhinieri Agroushqimore (Shkenca Ushqimore) në Universitetin Bujqësor të Tiranës, me rezultate të shkëlqyera akademike. Për arritjet e saj në studime dhe aftësitë komunikuese është vlerësuar me Certifikatë Ekselence.
Eva Ceka zotëron përvojë profesionale dhe akademike në arsimin e lartë, prodhimin ushqimor, kërkimin laboratorik, si dhe kontrollin e cilësisë dhe sigurisë ushqimore. Përvoja e saj përfshin angazhimin akademik në Universitetin “Aleksandër Moisiu”, si dhe pozicionin aktual si personel akademik dhe asistente ekzekutive në Kolegjin Universitar “Qiriazi”.
Formimi i saj profesional përfshin trajnime të specializuara të ofruara nga Agjencia e Standardeve Ushqimore e Mbretërisë së Bashkuar (Food Standards Agency – FSA), në fushat e alergjive dhe intolerancave ushqimore, si dhe të analizës së shkaqeve rrënjësore të problemeve në industrinë ushqimore. Ajo ka fituar gjithashtu përvojë praktike laboratorike në analizat mikrobiologjike, kimike dhe fiziko-kimike të produkteve ushqimore, si dhe në vlerësimin e sigurisë dhe cilësisë së tyre.
Interesat e saj aktuale akademike dhe kërkimore përqendrohen në ushqyerjen e njeriut, përbërjen ushqyese të bimëve të egra të ngrënshme, traditat ushqimore, biodiversitetin ushqimor dhe rolin e burimeve bimore tradicionale në dietën mesdhetare. Kërkimi i saj doktoral trajton përbërjen kimike dhe ndikimin e bimëve të egra në traditat ushqimore dhe ushqyerjen e njeriut në rajonin e Mesdheut, me vëmendje të veçantë ndaj disa llojeve të përzgjedhura të bimëve të egra, të përdorura tradicionalisht për konsum ushqimor.
Shih profilin ne Research Gate
