Edukimi liberal. Si qasje dhe praktikë

Libri trajton edukimin liberal si një qasje teorike dhe praktike për formimin e individit të lirë, kritik dhe të përgjegjshëm. Përmes kontributeve të Valbona Nathanailit, Martha Nussbaum, Steve Fuller dhe Konstantinos Giakoumis, analizohen kuptimi, karakteristikat dhe konceptet themelore të edukimit liberal, si dhe dallimi i tij nga liberalizmi arsimor. Pjesa e parë argumenton nevojën për një edukim që tejkalon përvetësimin e njohurive dhe aftësimin e ngushtë profesional, duke synuar zhvillimin e mendimit kritik, imagjinatës, empatisë dhe aftësisë për ta parë botën nga këndvështrimi i tjetrit. Në këtë kontekst, letërsia dhe artet paraqiten si mjete thelbësore për kultivimin e njerëzores dhe të qytetarisë demokratike. Pjesa e dytë e zhvendos diskutimin nga teoria te praktika, duke shqyrtuar marrëdhënien ndërmjet edukimit liberal dhe teatrit. Përmes dialogut, interpretimit dhe rrëfimit artistik, teatri shfaqet si një hapësirë edukimi, reflektimi dhe përballjeje ndërmjet ideve, historisë dhe shkencës. Duke ndërthurur filozofinë e edukimit me letërsinë, artin dhe teatrin, botimi mbron domosdoshmërinë e edukimit liberal në një shoqëri demokratike dhe në një kohë kur arsimi rrezikon të reduktohet vetëm në funksione ekonomike e profesionale.