Arsim dhe pabarazi. Sfida e perceptimit ndryshe

Arsim dhe pabarazi. Sfida e perceptimit ndryshe është një përmbledhje esesh, analizash dhe refleksionesh mbi arsimin, shoqërinë, politikën dhe kulturën shqiptare. Libri organizohet në tri pjesë tematike. Pjesa e parë trajton problematika të sistemit arsimor shqiptar, si pabarazia në arsim, raporti ndërmjet arsimit publik dhe privat, roli i universiteteve, shkollimi në kushtet e globalizimit, politikat arsimore, arsimi special dhe vlerësimi i sistemeve shkollore. Nëpërmjet një këndvështrimi kritik dhe liberal, autorja analizon sfidat e arsimit dhe paraqet rekomandime për reformimin e tij, duke nënvizuar rolin e politikëbërjes dhe të shoqërisë civile. Pjesa e dytë përqendrohet në ndryshimin e perceptimeve, në zhvillimet politike e shoqërore dhe në marrëdhënien ndërmjet demokracisë, pushtetit, modernitetit dhe qytetarisë globale. Pjesa e tretë sjell reflektime mbi figura, vepra, ngjarje dhe hapësira të jetës shqiptare, duke ndërthurur analizën sociale me kujtesën, kulturën, urbanistikën dhe përvojën personale. Në tërësi, botimi ofron një vështrim shumëdimensional mbi arsimin dhe shoqërinë, të mbështetur në mendimin kritik, argumentimin dhe nevojën për të sfiduar perceptimet e konsoliduara.