Biografia
MSc Sadie Gjana është pedagoge dhe profesioniste e fushës së infermieristikës dhe kujdesit social-shëndetësor, me përvojë të gjerë në praktikën shëndetësore, arsimin profesional dhe mësimdhënien universitare. Ka përfunduar Bachelor në Infermieri dhe Master Profesional, si dhe zotëron Lejen për Ushtrimin e Profesionit.
MSc Gjana ka ushtruar profesionin e infermieres në Spitalin Rajonal të Kukësit dhe ka një përvojë të gjatë në Shkollën e Mesme Profesionale Kamëz, ku ka punuar si mësuese dhe Shefe e Departamentit të Shërbimeve Sociale dhe Shëndetësore; ka kontribuar edhe në Universitetin Mesdhetar të Shqipërisë, në fushën e kujdesit infermieror, duke ndërthurur njohuritë teorike me përvojën praktike profesionale.
Në bashkëpunim me AKAFPK, MSc Gjana ka kontribuar si specialiste në hartimin dhe rishikimin e standardeve të profesionit, skeletkurrikulave, programeve orientuese, bankave të pyetjeve dhe materialeve mësimore për drejtimin Shërbime Sociale dhe Shëndetësore.
Në kuadër të zhvillimit të vazhdueshëm profesional, Sadie Gjiana ka kryer një sërë trajnimesh dhe kualifikimesh në fushën e arsimit dhe formimit profesional.
- Në vitin 2022, ka përfunduar me sukses kualifikimin e mësimdhënësve të kulturës profesionale në arsimin dhe formimin profesional, duke fituar kategorinë “Mësuese specialiste”, Grupi A, nga Agjencia Kombëtare e Punësimit dhe Aftësive.
- Në mars të të njëjtit vit, ka marrë pjesë në një vizitë trajnuese treditore në kuadër të projektit “Heimerer Schule” në Leipzig, Gjermani.
- Gjatë periudhës nëntor 2017–mars 2018, ka përfunduar trajnimin 24-ditor “Bazat e Didaktikës në Arsimin dhe Formimin Profesional”, të koordinuar dhe monitoruar nga Agjencia Kombëtare e Arsimit, Formimit Profesional dhe Kualifikimeve, me mbështetjen e GIZ-it. Trajnimi ka trajtuar psikologjinë e nxënësit, elementet themelore të didaktikës, planifikimin dhe realizimin e mësimit, menaxhimin e mjedisit dhe materialeve mësimore, si dhe vlerësimin e nxënësve dhe kursantëve në arsimin profesional.
- 30 mars–12 prill 2014 ka marrë pjesë në një program kualifikimi pranë Shkollës Shtetërore Profesionale për Shëndetin dhe Çështjet Sociale në Jena, Gjermani (Staatliche Berufsbildende Schule für Gesundheit und Soziales Jena). Programi përfshinte njohjen me sistemin gjerman të formimit profesional në fushën e shëndetit dhe të shërbimeve sociale, vëzhgime mësimore, udhëzim pedagogjik, metodologji të mësimdhënies dhe vizita studimore në institucione arsimore, shëndetësore dhe sociale.
Përvoja e saj ndërthur infermieristikën, mësimdhënien, drejtimin e departamentit dhe zhvillimin e kurrikulave profesionale, me fokus në përgatitjen cilësore të profesionistëve të ardhshëm të kujdesit social dhe shëndetësor.
