Kolegji Universitar Qiriazi mori pjesë në Konferencën e 5-të Ndërkombëtare Vjetore të organizuar nga Universiteti Kadri Zeka, një aktivitet akademik që mblodhi studiues, pedagogë, profesionistë dhe përfaqësues institucionesh nga vende dhe fusha të ndryshme, me fokus promovimin e kërkimit shkencor dhe zhvillimit të qëndrueshëm.
Në ceremoninë e hapjes, Anxhela Uldedaj, Kryetare e Bordit të Administrimit të Kolegji Universitar Qiriazi, përshëndeti pjesëmarrësit në emër të institucionit, duke vlerësuar rëndësinë e bashkëpunimit akademik dhe shkëmbimit të njohurive në një kohë kur transformimi digjital, inteligjenca artificiale dhe sfidat globale po ndikojnë ndjeshëm në zhvillimin e shoqërive moderne.
Në fjalën e saj, ajo solli në vëmendje trashëgiminë e pasur të Kolegjit Universitar Qiriazi, institucionit më të vjetër arsimor shqiptar, të themeluar nga motrat Qiriazi, duke theksuar se misioni i tij vazhdon të mbetet i njëjtë: vendosja e arsimit në shërbim të individit, komunitetit dhe zhvillimit shoqëror. Gjithashtu, u nënvizua roli i universiteteve si qendra të dijes, inovacionit dhe formimit të brezave të rinj, si dhe nevoja që kërkimi shkencor të lidhet ngushtë me nevojat reale të shoqërisë.
Një vëmendje e veçantë iu kushtua partneritetit ndërmjet Universiteti Kadri Zeka dhe Kolegji Universitar Qiriazi, i cili bazohet në vlera të përbashkëta si cilësia akademike, integriteti institucional dhe përkushtimi ndaj zhvillimit të arsimit dhe kërkimit shkencor.
Konferenca shërbeu si një platformë e rëndësishme për shkëmbimin e ideve, krijimin e urave të reja të bashkëpunimit dhe forcimin e lidhjeve akademike ndërmjet institucioneve të arsimit të lartë në rajon dhe më gjerë. Përmes pjesëmarrjes në aktivitete të tilla, Kolegji Universitar Qiriazi riafirmon angazhimin e tij për ndërkombëtarizimin, promovimin e kërkimit shkencor dhe ndërtimin e partneriteteve që kontribuojnë në zhvillimin e qëndrueshëm të shoqërisë.
